एस के नेपाल न्यूज सर्भिस
बुघबार,मार्च ,१०,२०१०

गृहराज्यमन्त्री रिजमान अन्सारीले आफ्नो पदबाट राजिनामा दिंदै हुनुहुन्छ। आठ महिना अघि राज्यमन्त्रीमा नियुक्त हुनुभएका अन्सारीले आज प्रधानमन्त्री माधवकुमार नेपाल समक्ष औपचारिक राजिनामा पत्र बुझाउँदै हुनुहुन्छ। देशमा शान्ति सुरक्षा बहालि हुन नसकेको भन्दै अन्सारीले राजिनामा दिन लाग्नुभएको हो। उदयपुरमा रहनुभएका प्रधानमन्त्री नेपाललाई राजधानी फर्केपछि बुझाउने राजिनामा पत्रमा उहाँले आफुले दिएका सुझावहरु गृहमन्त्री भीम रावलले वेवास्ता गरेको र सुरक्षा निकायलाई एकलौटी ढंगले चलाउँदा हत्या, हिंसा बढेको ठहर गर्नुभएको छ। देशमा हत्या, हिंसा बढी रहँदा आफु टुलुटुलु हेरेर बस्न नसक्ने भन्दै राजिनामा पत्रमा यस सम्बन्धमा प्रधानमन्त्रीलाई बारम्बार जानकारी गराउँदा समेत सुनुवाइ नभएकाले नैतिकताको आधारमा पदबाट राजिनामा दिनलागेको उल्लेख भएको राज्यमन्त्री निकट स्रोतले जनाएको छ। संचार उद्यमी जमीम शाह र अरुण सिंघानियाको हत्यापछि अन्सारीले सार्वजनिक रुपमै गृहमन्त्री भीम रावललाई पनि नैतिकताको आधारमा पद त्याग गर्न सुझाव दिनुभएको थियो। प्रधानमन्त्री सहित मन्त्रिपरिषद्मा एमालेका दश सदस्य मध्य अन्सारी मात्र संविधानसभामा प्रत्यक्ष निर्वाचनबाट चुनिनु भएको हो।